Prima pàgina > EUROPA DE SAS NATZIONES > CATALUGNA > ELETZIONES IN CATALUGNA: MAJORIA INDIPENDENTISTA

ELETZIONES IN CATALUGNA: MAJORIA INDIPENDENTISTA

Resurtados generales

giòvia 18 freàrgiu 2021, de AURELI ARGEMÌ

Durante sas dies pretzedentes a sas eletziones pro su rinnovu de su parlamentu autònomu de sa Catalugna, su 14 freàrgiu, totu sos partidos ant espressadu su timoria issoro chi s’astensione esseret arta meda. Difatis, s’astensione est istada arta a beru, sunt andados a votare petzi su 53,5% de sos marcados, sa pertzentuale prus bassa in totu s’istòria de sas eletziones catalanas. Ma non tantu pro farta de sensibilidade de sos eletores ma pro càusas esternas, mescamente pro sa timoria de sos contàgios de su coronavirus in sas sedes riservadas a sos votantes. Su problema s’est agraviadu in unu logu in ue sas votatziones in posta non tenent una traditzione cunsolidada e sos votos eletrònicos non sunt galu legalizados dae s’istadu.

Siat comente si siat, custas dificultades no ant cambiadu su panorama prevìdidu: sa partzidura de sos votos in duos blocos mannos, su de sos definidos costitutzionalistas, est a nàrrere in prode de su statu quo e su de sos indipendentistas, est a nàrrere sos chi sunt pro una tempus venidore totu democràticu.

Sos resurtados sunt istados sos pronosticados, ant bintu sos indipendentistas, cun majoria assoluta, 74 sègios, de 135 totales : Esquerra Republicana de Catalunya (de manca non comunista), 33 ; Junts pro Catalunya (partidu natzionale catalanu moderadu), 32; Candidadura Unitat Popular (alternativos anticapitalistas e feministas), 9.

Sende gasi, su partidu prus votadu est istadu unu de s’àteru blocu, su Partit Socialista de Catalunya (chi at aprovadu sa repressione de sa politzia), 33 sègios, ma otentos cun unu nùmeru prus artu de votantes a cunfrontu cun sos de Esquerra Republicana. In custu segundu grupu agatamus, a distàntzia manna, Vox (destra estrema ispagnola), 11 ; En Comú-Podem (a probe de sos comunistas e de su movimentu de sos "indignados"), 8 ; Ciudadanos (destra anticatalana), 6 ; Partido Popular (destra ispagnola), 3.

Novidades

In su chirru de sos indipendentistas, forsis sa novidade de prus importu est chi sos votantes in favore nch’ant coladu sa pertzentuale emblemàtica de su 50%, arribbende a su 51%. No est petzi sa prima bia chi ant otentu custu resurtadu ma est sa pertzentuale chi sas istitutziones europeas pretendiant pro pòdere incumintzare unu diàlogu diretu cun su pòpulu catalanu, pro pòdere agatare una solutzione giusta e cunsensuale a sas rivendicatziones suas. Sos indipendentistas sunt tando majoria finas dae su puntu de vista ufitziale. Unu datu chi at a fàghere istòria.

Un’àtera novidade est chi, pro sa prima bia a pustis de otanta annos, Esquerra Republicana at a torrare a sa presidèntzia de sa Generalitat (su guvernu catalanu ).

Sa de tres novidades: su Partit Demòcrata Català Europeu, s’erederi de su partidu fundadu dae Jordi Pujol, Convergència Democràtica de Catalunya, est iscumpartu dae su cuadru istitutzionale. No at otentu perunu sègiu. Cun custa iscumparta agabbat totu un’època polìtica nàschida in sa clandestinidade, cando galu bi fiat sa ditadura de Franco (mortu in su 1975).

S’opositzione at a tènnere finas issa una novidade, ca at a èssere dominada dae una partidu «frade» de su chi oe cumandat in su guvernu ispagnolu. In carchi manera, at a tènnere unas cantas "craes" pro cunditzionare sa posta in òpera de su pòdere autònomu. Sos sotzialistas catalanos ant a tènnere finas un’agiudu in su partidu En Comú-Podem chi, in sa versione ispagnola, guvernat in coalitzione cun sos sotzialistas de su PSOE.

In intro de s’opositzione est essidu a campu, pro sa prima bia, unu partidu de destra estrema, Vox, cun una presèntzia de importu. At giai naradu chi bolet burrare sas autonomias e pònnere in galera sos indipendentistas.

Programas

Semus galu in sa fase de sas discussiones pro formare sas majorias in su parlamentu e in su guvernu autònomos. A su chi ischimus, sas primas cunditziones fundamentales sunt: chi siat atzetada sa rechesta de s’amnistia de sos presoneris polìticos e de sos esiliados (totu guvernu catalanu de s’annu 2017 s’agatat in custas cunditziones) ; chi esistat unu cunsensu in sa facultade de esertzitare s’autodeterminatzione de su pòpulu catalanu; chi bi siat unidade a cunfrontu de sa finalidade, su recùperu de sas libertades, s’indipendèntzia.

In una segunda fase, at a bisongiare a discùtere sa cumpositzione e sos ruolos de sos partidos binchidores in su parlamentu e in s’esecutivu. Oe custu puntu est un’interrogativu. Totu est in funtzione de sos programas polìticos, econòmicos, culturales de cada partidu e de sa possibilidade de otènnere acordos e de fissare sas prioridades. Pro nde nàrrere una, Esquerra Republicana proponet de allargare sa base de sos cunsensos pro guvernare, tirende sos deputados de En Comú-Podem, favorèvoles a s’amnistia e a su deretu a s’autodeterminatzione, ma partzidu a cunfrontu de s’indipendèntzia. Una positzione contrària a Junts pro Catalunya e a sa CUP chi refudant sos ligàmenes costantes cun fortzas chi cunsìderant a su nessi ambìguas o incoerentes.

Un’àteru tema de cunfrontu in manera urgente: comente parare fronte, dae como in antis, sa pandemia, in s’ora chi sunt cumintzende a vatzinare sos tzitadinos e s’est acurtziende s’arribu de virus noos. E finas a rispòndere a sa crisi econòmica, in unu logu cun un’isvilupu industriale e turìsticu mannos, ma intradu in crisi profunda, cun un’aumentu lestru de sa disocupatzione, mescamente intre sos giòvanos, e de sas serradas de sas impresas minores. Cale tipu de raportu tocat a tènnere cun su guvernu tzentrale pro pòdere gestire in manera autònoma sos fundos europeos, pro torrare a propònnere su referendum pro s’autodeterminatzione ?

Esquerra Republicana creet galu in sa fortza de su diàlogu e de sos negotziados, sende chi b’at frustratziones costantes. Sos duos unos àteros partidos si fidant de prus, imbetzes, de su cunfrontu diretu e de torrare a fàghere su referendum de autodeterminatzione sena pedire peruna autorizatzione, s’in casu chi su guvernu tzentrale sigat a negare chi sos catalanos siant sugetos de custu deretu.

In fines, discutint giai si in su mundu globalizadu nostru sas tecnologias noas de s’informatzione devent tènnere unu riflessu in totu sos ministèrios de su guvernu catalanu. Sena ismentigare totu su chi s’interessat de s’ambiente e de sa partetzipatzione in sas istitutziones europeas, cun s’aplicatzione de su printzìpiu de subsidiariedade.